Maimartaba Sarkin Ningi da ke jihar Bauchi, Alhaji Yunusa Muhammad Danyaya, ya rasu, yana da shekara 88.

Sakataren masarautar, Alhaji Usman Sule, Magayakin Ningi, shi ne ya bayyana labarin rasuwar a wata sanarwa, inda ya ce, Allah Ya yi wa Sarkin rasuwa ne yau Lahadi da Asuba a Kano.

Sanarwar ta kara da cewa za a yi jana’izar Sarkin mai daraja ta daya, yau da karfe hudu na yamma a fadarsa da ke Ningi.
An haifi marigayi Alhaji Yunusa Danyaya a shekarar 1936, a garin Ningi kuma ya zama sarki a shekarar 1978.